Ti koze m ak drapo m

Ti koze m ak Drapo m…

 Yo di m lè w te fèk fèt

Ou te gen twa moso

Men  anvan w bat je w

Ou te deja pèdi moso

Yo di m  gen yon lè

Yon zèl ou te nwa

Men gen yonn tou

Ki pa janm chanje 

Se dwe paske li make san ?

 Yo di m te gen yon lè

Ou te pòtre de zanmi

Ki   te kanpe  kòt a kòt

Men vin rive yon lè

Yo kouche len sou lòt

Ki lè nou gade lòt nan je menm ?

 Lè nou len sou lòt

Oswa lè n kòt a kòt?

Oswa se lè sa make san?

Kantite moso

Koulè ak pozisyon

Toujou twòp pou mwen

Sa m renmen se lè w anlè a

Van vire w bò isit, bò lòt bò

Ou pa fè rebèl, ou danse

Oswa ou poze san pwoblèm

 Sa m pa konprann

Se jan yo fè w fè chimen yo

Yo voye w monte kon avyon

Epi lè pou w desann

Se tankou yon kabwèt

Se dwe paske desann nan make san?

 Kèk  ti kesyon m vle poze w depi lontan

Ki jan ou santi w jou fèt ou?

Ou resevwa kado ?

Diskou  granmoun

Ak  kadans ti moun lekòl

Kilès ou pi pito ?

Ochan pou sa n pa wè

Ak sèman pou n al pi lwen pase yo

Kilès ou pi pito?

 Ou wè sa n pa wè yo lè w anlè a ?

Yo mare  fache ak nou wi, pa vre?

Anhan ! Se sak fè lè yap desann ou

Se tou dousman yo blije fèl....

Ou toujou twò chaje ak pinga!

Se domaj ou bèbè !

 Fè jès pou ou di nou

Sa ou renmen non…

Na tanmen ba w

Kado ki fè w plezi .

Pale ak nèg ak nègès yo anlè a

Di yo nou pa konn sa nap fè

Menm lè jwèt la make san.

 Lunise Jules, May 17,2016

Rue de La Montagne