 |
| source - pinterest |
Mwen ta renmen...
Gen menm gou ak zaboka ayisyen
Men m’ pa ta renmen
Grenn vant mwen
Tounen balon foutbòl
Nan pye okenn tigason dezòd
Mwen ta renmen…
Santi bon tankou yon mango
Men fòk se ta yon mango batis
Pa gen ni sal men ni fil nan dan
Men, mwen ta jennen
Wè m tounen yon merilan
Mwen ta renmen…
Gen menm pouvwa ak kowosòl
Men fòk kò'm pa ta sanble ak kò'l
Sa twò fèm sonje Lè « Akne »,
Gwo bouton nan machwè
Te soti pou fèm pèdi tèt mwen
Sa ki ta fè'm kontan nèt …
Se si m ta ka bel
Tankou yon pye flanbwayan
Ki makònen ak yon pye Lorye
Men fòk mwen ta layite
Sou de bò wout ayewopò Pòtoprens.
Lunise Jules Cerin
Petionville, Haiti.
